و الله كبرت
و الله كبرت يا واد
و الشعر الأبيض بان
مبقاش بيقولوا عليك عفريت
و لا جن مصور زي زمان
و عرفت تحجر في دموعك
بعد ما كنت تبل عيونك
ع الفاضي و ع المليان
و صحابك هجروا حيطان البيت
و محدش منهم بيجيلك
كل الأبديت مش من جيلك
جسمك مش قادر على طوعك
و الحب اللي تعبت عشانه
مبقاش ساكن في ضلوعك
كل الأدوار مش من دورك
خليك قاعد و اسمع فيروز
لو حد مضايقك . عديله
مش زي ما كنت بتديله
أخرك تتضايق تضرب بوز
و القهوة اللي انت بتكرهها
إعملها حبيب
ما هو لازم نور الشمس
في لحظة يغيب
كل اللي في رأيك مش جايز
دلوقتي يجوز
و الله كبرت يا واد
و الشعر الأبيض بيزيد
و مفيش في حياتك أي جديد
عضلاتك دايما" كده قافشة
محتاجة يا واد تربيط عفشة
أو حبة تخلي الصحة حديد
و الله كبرت يا واد
والدنيا اكيد مش واقفة عليك
ماشية بيك أو من دونك
وزي ما كبرت فجأة عليك
راح تصغر اشياء في عيونك
إنما في الأخر لايقة عليك
تامر محمد
ليست هناك تعليقات:
إرسال تعليق