💣💣💣. ماسورة ضاربة 💣💣💣
ماسورة ضاربة قفلة الشوارع
والمية قاطعة ونورنا قاطع
والدولة حايسة علشعب دايسة
والشعب خايف و الحق ضايع
لاء ويقولولك خيوط مؤامرة
علي ايه يا حسرة بلا هري فاضي
انتوا المؤامرة وقلوب جبابرة
و انتو اللصوص و في زي قاضي
شغل دماغك هيجيبوا داغك
و يلفقوالك دستة قواضي
ارهابي خاين لبلاده بايع
ماسورة ضاربة قفلة الشوارع
ماسورة ضاربة والكل ضارب
حتي االي هارب ف البحر مات
نظام جباية ونظام ضرايب
و برضو تدفع وقت الممات
سلملي سلم علي بهية
عاشق عيونها بس ف سكات
والقلب دايب والعقل ضايع
ماسورة ضاربة قفلة الشوارع
ماسورة ضاربة والهم طافح
و شجرها طارح طبل ونفاق
ونظامنا ساقط ويقولوا ناجح
طب بالادلة او ب الخناق
اعلام مضلل عبيط يهلل
اعلام موجة علي اتفاق
كبر دماغك بيعه وقاطع
ماسورة ضاربة قفلة الشوارع
ماسورة ضاربة. والكل شارب
من المجاري ومن الهموم
حيل الغلابة مهدود ودايب
ساعة متزهق تنهق تذوم
وابن الاكابر عمال يتاجر
بقوت ولادنا او ب السموم
وعيني عينك ده شكله دافع
ماسورة ضاربة قفلة الشوارع
#الشاعر_ابراهيم_دعبس
ليست هناك تعليقات:
إرسال تعليق