////بيتنا القديم////
عديت على بيتنا القديم
ريحة زمان نفس الحنين
ريحة الحبايب لسه فيه
وعشره كانت من سنين
في كل ركن ف المكان
وحضن دافي كان زمان
وجيران حارتنا الطيبين
واللمه حلوه في العصاري
نحس فيها باالامان
في كل ركن ف المكان
هنا كان ابويا يلمنا
وف قلبه كان بيضمنا
ف ركن نابض كان هنا
ف صلاته كان بيأمنا
هنا صوره محفورة
ف جدار
كنت اما اشوفها ببتسم
دلوقتي ليه احساسي نار
كل اللي فيا بيتقسم
مابين حنيني واشتياقي
ودموع بشوفها بتترسم
ياذكري في قلبي مكسوره
ليه جايه تفتحي في جروح
قصادي لسه في الصورة
برغم بعاده عايشه الروح
تطبطب على الفؤاد والجرح
فترسم لي بطيفها الفرح
مشاهد فيها بس عتاب
مابين اختي وبين اخويا
يزول اللوم بدون اسباب
مادام بيننا سيرة أبويا
واختي اللي كات شايلة هموم
بكلمتين ساعة رضا
رجعت لاخويا مسلمة
كان صعب ان الحال يدوم
ويسيب قلوب متألمة
اللي جابنا فجأة سابنا
وساب أماكن فيها حاجه معلمه
سابوني وحدي
ف دنيا باهته مضلمه
لكني شايفاهم هناك
كل الوشوش متبسمه
أبويا مدخلش المدارس
لكنه لينا كان حضانة ومدرسة
مهما قسي مافي يوم نسي
يرسم لنا فرح وامل
صبح ومسا
قصة بطولة امنا
لما نكون سوا كلنا
كانت تعلمنا الحنان
ونحس وياها الامان
بيهم بنوصل للعنان
وحتي بعد ماراح زمان
لسه بنحكي عنهم
وارثين شهامة منهم
فيارب صبرا ع الفراق
وبرحمتك اغفرلهم
اما جيرانا وأهلنا
ف دول وصية ربنا
وأبويا نفسه قالنا
م الاصل وصل اللي معانا وحبنا
واوعاك لا تقطع حد كان بيودنا
وازرع يا ولدي
زرع خير في أرضكم
تلقي الاله بيحبكم
ولاجلكم هيحبنا
فازرع بذوركم عندكم
تلقي الثمار طرحت هنا
نعمات عماد
